Rabu, 18 Maret 2009

Bapikir Voor Bangun Torang Pe Kampung


OLeh: Iswan Sual



Buat kita pribadi, mo bangun kampung nda perlu terlalu muluk-muluk. Deng bapikir jo so bisa mulai bangun torang pe kampung. Torang orang Minahasa skarang musti lebe kritis dari orang-orang Minahasa dulu. Kalu dulu dorang bole beking masakan tino rangsak, erwe, geto, nasi ja'a, dodol, winongos, binolos, kukis apang, cucur deng tu laeng-laeng; nah kalu torang apa dang? Bukan kita anti deng tu tradisional-tradisional mar kita suka kalu ada orang Minahasa modern beking satu yang baru. Dulu waktu dorang pe masa, pasti dorang pe ciptaan blum cocok mo bilang masakan tradisional. Waktu itu dorang bilang makanan ciptaan paling baru.

Kita rasa torang musti lebe kreatif. Kyapa torang musti bagantong dari padi? Padahal torang punya banyak sumber makanan laeng. Kita yakin torang bisa beking makanan baru dari ubi, pisang, deng tu laeng-laeng. Kalu misalnya torang kreatif, torang nda lagi mo bergantong di beras. Orang-orang bisnis mo mancari akang pa torang. Karna dorang tau tu sumber makanan cuma satu-beras.

Kita heran skarang orang-orang stengah mati kerja berat siang malam pigi di kota cuma karna mo cari makang. Padahal kalu cuma mo makang, torang bole kembangkan banyak sumber makanan di kampung. Torang kwa skarang so iko-iko di sistem yang sangaja orang laen beking voor mo se untung pa dorang pe diri sandiri

Mungkin kita salah. Mar coba kwa torang orang Minahasa pikir bae-bae. Cita waya esa. Tou Minahasa.

1 komentar:

Unknown mengatakan...

Setujuuuuu!!!!!!!
Klo boleh kelola apa yang ada kiapa mo siksa2 merantau tak jelas.... lebe bae majukan kampung sendiri... dengan bgtu bangsa bisa maju..., karna yang memegang peran utama dalam kemajuan suatu bangsa adalah masyarakatnya sendiri.....