Sabtu, 21 Maret 2009

Karna Mega Mall?

Oleh: Iswan Sual


Amper tiap hari kita lewat di Mega Mall. Selain suka ba angin sadiki, lengkali ja ba tamang akang pa tamang kalu dia mo perlu ba bli apa-apa. Mar paling banyak kali kita ja iko di jalang di muka Mall. Soalnya abis kerja kita deng tamang ja singga bli ikang di rumah makang.
Kita lengkali ja stres deng marah kalu lewat di trotoar karna banyak yang so ba dudu di trotoar. Tu paling parah karna so banyak yang ja pake tu trotoar voor bajual deng parkir motor deng oto. Kita lengkali babatanya sandiri:kyapa dorang nda ada ontak sto kang? Orang ja ba jalang akang, dorang so beking dorang pe tampa jual pulsa, nasi, rokok, jasa ojek, deng laeng-laeng. Di dalam hati kita lengkali ba taria "bangsat ni orang-orang! Nda da ontak!".
Mar skarang kita so dapa depe jawaban kyapa sampe dorang bagitu. Ternyata katu dorang itu korban dari reklamasi pante waktu lalu sampe skarang. Dorang no katu yang umumnya dulu tukang cari ikang. Dorang pe parau dulu ja sandar di pante yang mega mall so ambe skarang. Tu pante dulu katu dorang pe tampa mancari voor dapa doi makang deng tambah-tambah voor mo se skolah anak. Napa sto dorang pe anak so putus skolah. Sampe-sampe sto dorang pe anak-anak yang ja pake tu trotoar voor tampa batunggu sampe lat skali mo tunggu oto-oto bos di megamall ja singga datang ambe. Dorang ana ya tu so jadi lonte karna pengusaha deng pemerintah pe baku ator. Oh kasing katu torang pe nona-nona Minahasa. Dulu jadi tuan tanah skarang stenga mati cari doi di tanah sandiri karna orang luar so ambe. Kita le kwa heran kyapa pemerintah sampe kase biar tu pengusaha reklamsi tu pante voor jadi mega mall. Memang katu waktu baru mo buka dorang bilang itu mo buka lapangan kerja. Mar kita lia-lia tu ja kerja cuma tu pelayan-pelayan yang orang Minahasa. Kebanyakan yang tu dudu di posisi bagus tu orang luar katu ya.
Lapangan kerja yang tersedia nda se banding deng tu orang yang ilang kerja karno mega mall so se badiri. Kasiang katu tu orang Minahasa. Bangga-bangga nda tahu apa yang mo se bangga. Mangaku-mangaku Manado masih torang pe tanah, padahal orang laeng so kuasai. Kasing katu tu orang Manado.
Sadar e. Lama-lama torang pe tanah cuma jadi sejarah kalu dulu itu pernah jadi torang pe tanah. Jadi torang mo apa skarang?

2 komentar:

D'Queen mengatakan...

Semangat terus ya buat menyuarakan isi hati

Iswan Sual mengatakan...

thanks